ZORAM TODAY| Aizawl 15th May, 2024: Vawiin chawhnu khan Convention Centre Meeting Hall, Lungleiah Lunglei Municipal Council (LMC) buatsaihin Lunglei Municipal Council huam chhunga Property Tax Assessment buaipuitu tur mi 24 te hnenah ram teh dan tur chungchang  inhrilhhriatna hun hman a ni. He hun hi Pu Zorinsanga Hmar, Executive Councillor, Pu R. Lalramzauva leh Pu R. Lalremsiama, Councillor ten an telpui a ni.

Property Tax Assessment hi Lunglei Municipal Area a Local Council Veng 24-ah neih tura ruahmanna kalpui a ni a. Veng hrang hrang te chu Category-ah then hran niin; category hi A, B, C leh D a then a ni. Assessment hi May 16, 2024 atangin veng hrang hrangah inthen in mi 24 ten an nei dawn a. Property Tax Assessment hi thawh hnih a then a ni a, thawhkhatnaah Pukpui, Zotlang, Sekawn, Zohnuai, Bazar Veng, College Veng, Venglai, Rahsiveng, Sazaikawn, Hauruang, Electrict Veng leh Chanmari te an ni. Heng Local Council 12-ah  te hian Assessment hi tih hmasak tur a ni. Heng veng 12-a Local Council hruaituten theitawp a lo tawiawm turin LMC chuan a ngen bawk a ni.